المحامي "مجدي إبراهيم " رايح قسم حدائق القيه
مع موكلته اللي جوزها مشتكيها
عادي جدا لحد كده
اللى مش عادي إن أمين الشرطة
يضرب محامي الموكلة مهما كانت الأسباب
وكمان يعلقه على باب غرفة في القسم
ويحط الكلابشات في إيده ويهينه
رغم إنه عضو نقابة المحامين
اللى مش عادي بقى
إن مأمور القسم ونائبه ومعاون المباحث
ضربوا المحامي وشتموه
ايه السادية اللى حلت على وزارة الداخلية بكل كيانها
احنا كنا فاكرين ان امن الدولة بس اللى فيها ساديين
لكن اتضح انها عدوى انتشرت كالنار في الهشيم
أمين شرطة المفروض انه موظف بيخدم المواطنين
والمفروض انه شغال عند الناس علشان حفظ الامن
ودوره محدود جدا وهامشي
لكن طبعا هو مستقوي بالبدله الميري والبيه الظابط اللى هيحميه
اللى هو طبعا اما بيجيب له الخضار أو بيوصل له العيال المدارس
أو بيروح ينضف له البيت
فطبعا لازم يطلع كل ده على الناس
على الشعب
على البشر اللى هو المفروض خدام عندهم
لأنه أصبح خدام شخصي لسيده وعلشان كده بيحميه
فبيطلع غله وحقده وعقدة على الناس
وعلشان الإنصاف أكيد في ناس كويسة بس قلبل جدا
أو أنا عن نفسي مقابلتش و لا حد من أصحابي
المهم المشكلة ان المحامي له قيمتة ومركزه واحترامه
غصب عن أي حد في أي مكان في العالم
الا في مصر
اللى تحس إن ظباط الشرطة بيتعاملوا مع المحامين
كانهم شغالين عندهم
رغم إن المحامي
ممكن يكون جايب مجموع في الثانوية أكتر من ظابط الشرطة
وممكن يكون طالع من بيت كويس ومتربي أكتر منه
رغم اعترافنا إن في محامين كتير مش كويسين
وبيتعاملوا مع القانون بأساليب قذرة
لكن في نسبة كبيرة جدا من الشرفاء ومحدش يقدر ينكر
لكن التجاوزات في حق المحامين زادات
لكن المشكلة مش في المحامين بس
لا ده القضاة اتبهدلوا من الشرطة
والأطباء
والمهندسين
والعمال
وشباب الجامعات
والستات والبنات
هو باقي مين في البلد ما اتهانش
وهو العادلي ده إبن مين في مصر
علشان يعني كان في أمن الدولة
علشان الملفات اللى ماسكها على ناس كتير
هو في وزير داخلية بيقعد 10 سنين في أي بلد في العالم
هو في وزير داخلية تحصل كوارث مروعة في عهده ويقعد برضه
هو إمتى هيمشي
الله أعلى وأعلم
هو لم يستقيل أو يقال لما حصلت التفجيرات في أنحاء كتير من مصر
ولما ظهرت فيديوهات التعذيب
ولما معرفش يسيطر على الفتنة الطائفية
ولما سحل طلبة الجامعة
ولما اعتقل المئات في المظاهرات "السلمية"
ولما قتل وعذب الأبرياء البسطاء في أقسام الشرطة
هو في أيه
هو محدش شايف إن الراجل لا يصلح غيرنا ولا إيه
وليه الناس بتهاجم مساعدين الوزير
ومديري الامن
والمأمورين
ومش بتتكلم عن رأس الهرم
العادلي خلاص كفاية عليه كده
إحنا زهقنا
والأحوال بقت لا تحتمل
دي حاجة غريبة
وبعدين نلاقي في كل تغيير وزاري
يقولك محصلش تغيير أصل دي وزارة سيادية
عرفنا يا سيدي إنها "سادية"
بس هو يعني إيه سيادية أصلاً .. فوق الحساب مثلا ؟
إحنا خلاص زهقنا من فضايح الداخلية
وعاوزين العادلي يمشي
أقيلوه يرحمنا ويرحمكم الله
ليست هناك تعليقات:
إرسال تعليق