نظيف .. رئيس مجلس وزراء دولة رجال الاعمال

بلال دياب شاب مصري بيحب مصر
طالب في كلية آداب
ناشط سياسي
مش بيخاف زى كل الجيل الجديد
عارف إن مفيش حل إلا أننا نقول لا
عارف إن الخوف والصمت جريمة
علشان كده قام وبكل جرأة
ومن غير تفكير في إيه اللي هيحصل بعد كده
وقال لنظيف رئيس مجلس وزراء دولة رجال الأعمال
" يا ريس مصر حزينة يا ريس
يا ريس شباب المعتقلين بتوع 6 ابريل يا ريس
هما الشباب بتوع الانترنت
ياريس الشباب المعتقلين عاوزينك تفرج عنهم
ياريس انا عايز أقولك على حاجة
الجامعة زي الفل
والتعليم زي الفل
ورغيف العيش موجود
والديمقراطية موجودة
والحرية موجودة
يا ريس افرج عن مصر يا ريس "

لمشاهدة الفيديو اللي رفعه وائل عباس إضغط هنا
لحد هنا كويس

اما اللى مش كويس بقى فهو كلام العم نظيف
اللى استفزني جداًُ وفور دمي
نظيف اللى خلى البلد نظيفة حتى من رغيف العيش

فقلت لازم أرد عليه وأقول اللي الناس عاوزة تقوله لسعادة البيه :-

" أنا مثل كل الشباب الذين صفقوا لك"
لا انت مش زي حد لانك اصلا متعرفش حاجة عن مصر

ولا عن مطالب المصريين ولا احلامهم ولا ابسط مطالبهم

لانك مش بتعبر عنهم

" ولكن أشعر بنبرة السخرية في كلامك "
هو يعنى نتكلم ونهاجم مش نافع ، تسخر منكم مش نافع

طيب ما تفارقونا

" ولو لم تكن في مصر ديمقراطية لما استطعت أن تعبر عن رأيك اليوم "
لا احنا بنعبر عن رأينا غصب عنكم لانكم متقدروش تسيطروا على الانترنت

وبعدين تفسر بايه انهم اخدوا بلال لمكتب حرس الجامعة واحتجزوة هناك وضايقوة بعد ما اتكلم

صحيح بلد ديمقراطية

" إنت لازم تعرف أن فيه تهديدات بتتعرض لها البلد "
انتم اكبر تهديد للبلد اصلا يا عم نظيف

انتم ضيعتونا .. وخربتوا مصر

والتهديدات دي ليكم انتم الا اذا كنتم بتعتبروا نفسكم البلد اصلاً

" ولازم تفرق بين التعبير عن الرأي والاستئذان وهو شيء آخر "
التعبير مكفول لكل انسان على وجه الارض طالما سلمي و انت شايف الاعتراض جريمة

والتعبير عن الغضب وعدم الرضا تخريب

وبعدين احنا اصلا مش معترفين بيكم علشان نستئذن منكم

" مصر بها حرية وستظل بها حرية تتمثل في الصحف والقنوات الفضائية"
الصحف الحزبية والمستقلة

مش الصحف القومية الماسخة اللى ملهاش أي طعم ومعنى وصحفييها من امثال احمد موسى

بتكتب عن جنة الخلد اللى محدش شايفها غيرهم وغيركم
والقنوات المستقلة اللى بتحاربوها مش قنواتكم الملاكي

"الحكومة القوية هي التي تستطيع أن تمسك أعصابها ولا تفقدها بالنقد"
بأماره رؤساء التحرير اللى عليهم احكام

والصحفيين اللى بيتحبسوا

والنشطاء اللى بيعتقلوا

وبأمارة انك بتقول عننا شعب غير ناضج ولا نستحق الديمقراطية

وانك بتقول ان مصر دولة علمانية يا سيادة رئيس وزراء رجال الاعمال

وانت شكلك مش فاهم انت بتقول ايه اصلاً

"أن جميع دول العالم تعاني من غلاء الأسعار"
لكن مستوى الدخل يا استاذنا بيغطي المصروفات الاساسية على الاقل

مش زي مستوى دخل المصريين في عهدكم المصون

اللى بقى زي الصومال وكينيا واوغندا

ممكن تنزل في يوم كده متخفي من غير حراسة وتشوف احوال المصريين ؟ .. طبعا أشك

"أن رغيف العيش الذي لا يعجب الناس يقفون من أجله في الطابور ليحصلوا عليه في النهاية .. هناك من لا يجده أصلاً"
هو انت عندك حل تانى

ما هي الناس لو ملقتش الرغيف هتموت من الجوع ولا يأكلوا بسكويت حضرتك

وبعدين الناس كده كده بتموت في عهدكم بالطيارات والسفن والقطارات والحرائق وعلى كل شكل ولون

يبقى يموتوا وهما بيسعوا على رزقهم احسن يمكن يموتوا شهداء

"ونفى صحة ما يقال عن عدم شعور المواطن بالإصلاح الاقتصادي قائلا بأنه "شيء غير صحيح"
هو انت كنت مسافر يوم 6 ابريل

مشفتش الناس عملت ايه

مشفتش شوارع القاهرة فاضية

مشفتش الثورة العارمة للناس

ولا مكنتش لابس النظارة الطبية الغالية بتاعتك يا سيادة البيه رئيس وزراء دولة رجال الاعمال

والله انا مسكت نفسي بالعافية ودونتها اكتر من مرة علشان احذف كتير من اللى كتبته