مسئولون وجهلة (1)

لا أحب أن أهاجم أحد هجوماً شخصياً
ولكن فاض الكيل
وبلغت الروح الحلقوم
لذا وجب الرد على هؤلاء السفلة
الغير مؤهلين
الذين هبطوا على مناصب قيادية
وحساسة
لا لشيء إلا لأنهم
منافقين
مهادنين
تافهين
مطيعين
مستسلمين
يعيثوا في الأرض فسادا ً
وبلطجة
ووقاحة
يتخيلوا أن أحداً لا يستطيع التصدي لهم

لكننا لن نصمت على حق شعبنا
ولن نتقبل اهانته
ولن نصمت بعد الآن
فصمتنا خيانة

يا رازق النمل علي الطريق .. قفلوا البحر ولغوا الدقيق

محافظة كفر الشيخ
مسقط رأسي
محافظتي الجميلة الهادئة
العريقة والتاريخية
وإناسها الطيبين المسالمين
وشعبها المثقف والواعي
لا تستحق مثل هذا المحافظ

أحمد زكي عابدين
فليس له تاريخ سوى أنه كان محافظاً لبني سويف
ولم تظهر له كرامات أو إنجازات
وجاء الي كفر الشيخ ليثير العواصف والأزمات
وفجر الأزمة في البرلس قراره المتسرع والغير مدروس
بإلغاء حصص المستودعات من الدقيق المدعم ومنع صرفها على بطاقات التموين
وقرار منع الصيد في شهري يونيو ويوليو

فيا عم المحافظ
هو انتم لا ترحموا ولا تسيبوا رحمة ربنا تنزل على البشر
يعنى لا في حياة كويسة
ولا هوا نظيف
ولا كهرباء لمعظم قرى البرلس
ولا صرف صحي
وكمان مش عاوزينهم ياكلوا
عاوزين تجوعوهم
عاوزين تموتوهم
هو احنا في غزة ؟

حرام عليكم يا أصحاب الأبراج العاجية
يا اللى بتفطروا كرواسون ونسكافية
الناس عاوزين دقيق علشان تاكل عيالها عيش حاف
حتى ده شايفين انه خسارة في شعبنا
والله انتم خسارة فيكم الحياة أصلا

مشكلتنا في مصر .. اللى مبقتش محروسة
ان كل المسئولين تقريباً محدش فاهم منهم أي حاجة
ولا يعرف أبعاد أي أزمة بيواجهها
ولا بيدرس طرق وحلول بشكل سريع ودقيق وياخد قرار
لان هما أصلا مش أهل للمسئولية
وغالبيتهم مش عارفين هما ليه اختاروهم لمناصبهم

حلفناك بدينك .. يا زكي مش عاوزينك

الراجل ده طلع في برنامج اتكلم مع الزميلة لميس الحديدي
وفعلا هو اتكلم
لكن بكل وقاحة واسفاف
في رده على سؤال لميس "هل مهنة المحافظ هي أسوأ مهنة في مصر؟"

وهي نفس الجملة اللي قالها في القاهرة اليوم مع عمرو أديب
رد بغضب وقال بالحرف
إنتي مرات (عمرو أديب) وأنا عارف
وطبعا عاوزة تاخدي بتار جوزك
وعشان كده ما رضيتش أجي لك البرنامج
بلاش الأسلوب ده إنتي قاعدة مجعوصة إنتي وجوزك
انتوا الاثنين قاعدين مجعوصين وعمالين تقولوا أي كلام

بالذمة ده كلام واسلوب واحد محافظ
ده اسلوب واحد بلطجي
واحد قاعد على قهوة
واحد بياخد النقد بشكل شخصي
يا سيدي انت لو مش محافظ محدش يعرف عنك حاجة
ولا حد هينتقدك
لكن انت اخدت منصب مش مؤهل له
علشان كده النس من حقها تنتقدك

وانا بصراحة هتجنن من شعارات الفكر الجديد بتاع الحزب الوطني
هو فين الفكر الجديد والعبور للمستقبل
جايبين لنا ناس مش فاهمة حاجة خالص
وكمان وقحين وبيتطاولوا على الشعب
اللى المفروض انهم خدامينه
وبيشتغلوا عنده
وبيقبضوا من فلوسه
وبيعملوا على راحته

هما الناس اللى بتختار المحافظين دي مغيبة
أحمد نظيف اللى بيرشح المحافظين
ومستشاري الرئيس اللى بيصدقوا على الاختيار
وأمانة السياسات اللى ساكتة عن الفساد
والله ده حرام

تحذير هام :-

الناس على حافة الانفجار
ولو حصل والله هيكون بركان
هيقضي على الاخضر واليابس
ومش هيسيب حد ولا هيسيب حاجة

وأخيراً أردد الشعار الشعبي الشهير
" يا تأكلونا ... يا تموتونا "